本文重點
農曆年將至，唔少政商界名人都會外遊避年，好似商務及經濟發展局前局長馬時亨就揀咗去陽光燦爛嘅泰國。肥亨早前幫襯前行會成員陳智思間泰國康民醫院驗身，朝早八點去驗身，下晝一點已睇到報告，健康指數極之靚，令佢放下心頭大石，趁新年同家人遊泰國蘇梅島。
咁啱得咁蹺，立法會議員梁君彥同囝囝、新抱、囡囡同妹妹就會去泰國皇室度假勝地華欣，當地高球場綠草如茵，佢同囝囝大可過足高球癮。
梁高美懿唔得閒出門
名人爭出門，女大班恒生行政總裁梁高美懿就唱反調留港度歲，尋日梁太拖埋媽媽、老公同姪女喺中環食晏。佢話新年節目多，初一例牌同奶奶拜年，又會趁當日食齋，然後買定靚雞同肥魚預備一餐豐富開年飯，忙到氹氹轉，又點得閒出門呢。