都話好帶挈o架啦！泛民主派五區總辭仲拖累立法會足球隊前路茫茫。由於賽例規定要有六個議員落場先可以立法會之名出戰，湊唔夠數就要取消賽事，依家社民連兩個「波牛」陳偉業同梁國雄執包袱後就少咗人踢，下月六號同駐港總領事嗰場友誼波亦好大機會要取消。
不過，立法會足球隊領隊「ＩＴ豪」譚偉豪對少咗兩隻鐵腳不以為然，聲言「一雞死一雞鳴」，話依家議會仲有好多波友，只係下月場波因為好多議員唔喺香港，可能被迫取消。
其實有咁多男議員，搵六個落場絕非難事，可惜好多議員都對踢波唔熱衷，結果踢嚟踢去都係嗰幾隻波腳，仲要嚴重老化兼慣性放飛機，睇嚟靠外援贏波嘅宿命都好難改變嘞！