「光纖之父」高錕尋日將諾貝爾獎物理學獎捐畀中大，聽日亦會出席母校聖若瑟書院三十五周年校慶活動，相信一眾名人校友都會蜂擁而至。
話說身為母校信託基金會員嘅Jeffrey林健鋒，前日去日本出席關於港日經濟合作嘅會議，本來禮拜日先返，但難得可以同高錕師兄一聚，所以佢特登改機票提早一日返嚟。
師兄要支持，後輩亦要提攜。由Jeffrey所屬嘅經濟動力同港大合作搞嘅「Meet the Entrepreneurs」，嚟緊又請到勁人同班學生哥分享營商之道，今次主角係新鴻基地產副主席郭炳江。
Jeffrey又話好感激上次嘅嘉賓、長實副主席「小超人」李澤鉅，事關超時咗好多，搞到佢啲員工攞定快勞等佢一講完就即刻開會，認真唔話得。