老實講，佢哋咁搞法確實損人不利己，一來累街坊嘥公帑，二來早前有民調就話因為公投鬧劇，公文袋黨魁余若薇同辭咗職嘅袋巾傑都民望插水，成為「公投」大輸家，依家諗番轉頭，佢哋會唔會呻笨呢？

飯盒會密謀獨食

五個泛民議員辭咗職後，仲留低咗啲蘇州屎要其他人幫手掃，例如佢哋本來孭開嗰啲委員會職務，內務委員會主席劉健儀尋日都話有四個委員會需要補選填補辭職議員空缺，包括議事規則委員會、議員個人利益監察委員會、立法會政府帳目委員會，同梁展文事件調查委員會等，而重選委員同埋中大校董個位，就決定喺本月二十六號嘅會議上進行。

喺早前嘅泛民「飯盒會」上，佢哋已經密謀要獨食，即係將呢啲職位由泛民自己友頂上，但係咪咁易到手，都要睇吓建制派嘅態度，但係白鴿黨嘅甘乃威尋日就率先偷咗雞。事關公文袋嘅陳淑莊未辭職前係民政事務委員會副主席，既然辭咗職，尋日喺事務委員會會議上要進行補選，而甘威喺冇對手之下當選。

話時話，早前白鴿黨想由甘威頂替黨友鄭家富入帳委會，點知爆出甘威求愛不遂炒女助理事件，即時上位無望，依家因為五區總辭，而泛民之間曾協調畀甘威喺下立法年度替代陳淑莊做民政事務委員會副主席，既然剩番嗰幾個月，咪畀甘威頂埋囉，於是乎甘威就提前執死雞嘞！多得五區總辭，令甘威變成最大嘅得益者，佢仲唔C住半邊嘴偷笑咩！

至於其他嗰幾個職位，據聞建制派覺得都係既難啃又花時間，唔多願自找麻煩，屆時好可能會鬆章畀泛民，等泛民自己爭餐飽好過喎！