眨吓眼，新財政預算案就快出爐，財爺鬍鬚曾近日四圍諮詢，仲專登為八十後準備咗一本漫畫，話要「請你發表意見」咁話。但係太一叮打開本漫畫，就見到好礙眼嘅一句，「派錢太短視」。講到底，所謂諮詢無非又係呻窮。呢，尋日鬍鬚曾又喺度大喊「狼來了」，話未來經濟仍然會反覆，所以要審慎務實制訂預算案喎。

到底政府有幾窮？不妨聽吓專業人士嘅意見。有會計師保守估計，政府本年度嘅財政狀況好過預期，財政赤字最多只有百幾億，遠遠少過鬍鬚曾預計嘅四百億元赤字。亦有會計師估計，本年度唔單止唔會出現赤字，甚至會有盈餘添。嗱，政府前日自爆，因為財政狀況得到改善，首三季財赤大幅收窄到十二億元，其中仲未計過百億元賣地收入，同埋年初嘅巨額稅項收入。

太一叮唔係會計師，但係見到盤數咁靚，都可以大膽講句，本年度政府財政十居其九唔會見紅。既然政府財源廣進咯喎，係咪好應該開倉派糖，還富於民先？

今時今日，升斗市民嘅生活一日不如一日，貧富懸殊不斷惡化，貧窮人口繼續膨脹，唔少打工仔死做爛做，但係收入仲少過綜援。雖然政府一時又話推動十大基建，一時又話搞六大產業，吹到天花亂墜，但呢啲大計唔係太過長遠，就係虛無縹緲，根本無法紓解貧苦大眾嘅燃眉之急。講多無謂，食多會滯，派糖最實際，鬍鬚曾，你聽到未吖？

其實，除咗基層人士叫苦，中產嘅處境亦唔好得去邊，尤其喺金融海嘯之下，好多中產人士失業嘅失業，減薪嘅減薪，最近嘅人口統計數據顯示，香港中等入息家庭愈嚟愈少。由此可見，中產階級正在萎縮，生活質素不斷下降，民怨愈積愈多，唔怪得咁多人走上街頭啦。

最近，美國總統奧巴馬都話要向中產派糖嚟挽救民望，特區政府係咪應該有所啟發呢？抑或繼續視民望如浮雲？

家陣基層陷困，中產受苦，只有政府豬籠入水。呢，立法會各黨派準備聯手通過動議，提出二十幾項紓困建議，包括寬免差餉、資助貧困學童上網、提供永久性跨區交通津貼等等，逼鬍鬚曾放水。一言以蔽之，市民嘅訴求好簡單，就係要求財爺開倉派糖，還富於民。如果鬍鬚曾唔順應民意，繼續一毛不拔，就算搞幾多場諮詢，出幾多本漫畫都係嘥氣。到時唔止八十後，連七十後、六十後同五十後都齊齊上街，睇你個孤寒財主仲敢唔敢話「派錢太短視」，叮！