小白觀點：災星煲呔曾玩殘福地

睇電視新聞見到沙塵滾滾，一片頹垣敗瓦，香港人有個慣性，總覺得天災戰禍離自己好遠，小白老弟都唔例外，好自然以為唔係阿富汗有恐襲，就係海地大地震嘅續聞啦，殊不知睇睇吓唔多對路……咦！有香港消防員用雙手起勢挖掘喎，嘩！不得了喇，原來係土瓜灣有幢五層高嘅舊樓冧咗落嚟，真係講都冇人信。

最奇怪嘅係，聽聞當局之前驗過樓，拍心口話冇即時倒塌危險，點知話口未完就應聲冧畀你睇，所以香港人唔好再覺得呢度係一塊福地喇，快啲增強一下危機意識同自救能力啦，事關本欄一早已經話煲呔曾係災星，佢一日賴死唔走，六月飛霜發生雪災都話唔埋㗎！

網友觀點...X）...

[　超　人　]

如果喺夜晚個個返晒屋企喺樓入面嗰時冧，仲死得人多呀，隔籬嗰幾幢都危危乎咁樣喎！

[　人到中年　]

令我諗起618旭龢道冧樓事件，轉眼又過咗38年喇……

[　小　黑　]

全港有唔少呢類舊樓，可憐住喺裏面啲居民，日夜都要提心吊膽咁生活！！！

[　森　森　]

換樓潮一定又起，慘在冇錢換樓嘅一群，日日瞓覺都驚唔知層樓會唔會冧。

網址：www.sunsiupak.blogspot.com

阿豪觀點：窮鬼至會住計時炸彈

馬頭圍道一幢五層高嘅唐樓突然冧咗，得番堆頹垣敗瓦。香港話晒都係「紐倫港」之一，啲樓點會咁化學㗎？

講開紐倫港，真係觀點與角度，正如你去孟買，接觸親都係有錢人，梗係覺得呢個印度金融首都唔係浪得虛名啦，但你睇吓《一百萬零一夜》，就會有唔同體會。最近《時代》雜誌跟進三地喺金融海嘯一年後嘅表現，讚到香港天上有地下無，梗係啦，淨係搵啲金融界人士傾……

講番冧樓事件，有人話香港有萬幾幢三十年樓齡以上嘅舊樓，等於有萬幾個計時炸彈。但計豪伯話，咁講只係啱咗一半，始終都係窮鬼至會住危樓嘅啫，禮賓府成百幾年歷史添啦，又唔見有事？

網友觀點...X）...

[　大角咀　]

唉，我依家住嗰度都成四十幾年樓齡，真係驚驚哋，唔知幾時會無端端冧落嚟……

[　馬爾代夫王　]

太誇張喇，開頭以為係大陸冧樓，點知係土瓜灣，簡直難以置信！！

[　神經佬　]

鏹魔呢單嘢仲未驚完，依家又整單冧樓，以後冇必要都咪出街！

[　Grey　]

唔知裏面仲有冇人呢？希望被困嘅人救得番啦！

網址：www.lukchiho.blogspot.com