禮賓府失守，煲呔曾嘅家丁神通廣大引起好多討論，但市民關心嘅唔係嗰班「80後」青年點解可以招積遊禁地，而係守衞森嚴嘅禮賓府畀咁多不速之客闖入，竟然冇人知、冇人理，有人認為件事反映政府管治出咗大問題，行政會議召集人梁振英（CY）尋日就義正辭嚴否認呢個講法，佢話：「唔存在任何管治問題。」
CY仲話，佢爸爸以前曾經做過警察，咁啱得咁蹺，仲守過禮賓府嘅前身港督府添，CY細個曾經喺禮賓府警崗後面嘅花園玩，所以佢對禮賓府保安信心仍在。
不過，咁多不速之客闖入政府機要地方，喺港英年代固然匪夷所思，即使喺今日都令人難以接受，但願呢班「80後」只係貪得意玩吓，如果唔係，政府真係有排尷尬！