粵劇成為世界非物質文化遺產後，好多人都關心承傳問題，八和會館主席汪明荃一直擔心業界青黃不接，批評政府之餘，幾乎呻到樹葉都落埋，政府早前決定透過職業訓練局及旗下「IVDC」匯縱專業發展中心，同八和會館合作，為粵劇界從業員開辦再培訓課程，仲誠邀汪阿姐做宣傳大使添。汪阿姐尋日出席粵劇課程推廣活動時全程風騷笑晒口，似乎條氣順晒。
佢咁瞓身宣傳，第日會唔會親手執教呢？汪阿姐好謙咁話：「我邊有資格教學生吖，家英哥（羅家英）同阮兆輝就有資格教嘞，兩人係戲班出身，大戲嘅排場係佢哋先至識，技能好珍貴，可以勝任教學生。」
有關粵劇培訓課程將會開三至四班，每班十二人，由粵劇資深大老倌任教，而現時IVDC已有個興趣班課程，教授粵劇基本身段、做手、走位，學費一千一百元。多啲人學大戲，汪阿姐就唔使擔心冇人接班啦。