阿涂話，早前搵辦事處時曾經考慮過與倒塌大廈兩幢樓之隔嘅一個七百呎閣樓單位，鍾意嗰度喺正大馬路，人流多啲，但月租要九千蚊，最後揀咗相差兩個街口嘅榮光街舖位，月租八千蚊，佢嘅新婚太太蘇麗芬都話老公福大命大啦﹗阿涂喺牛年真係幾旺嘅，搵到人生另一半，又逃過今次大難，十足行運超人咁。

區內發生咁大件事，佢哋尋日都將開幕儀式一切從簡，仲為意外中嘅死者默哀一分鐘。開張完畢後，阿涂仲急急腳走咗去現場視察。其他黨派議員亦好緊張，建仔李慧琼前日率先到現場視察，又話九龍城嘅區議員準備自掏腰包，一齊夾錢捐畀死者家屬。積極喺九龍西做嘢嘅富貴黨常委田北辰亦唔執輸，前日視察意外現場後，即晚就開會決定由黨嘅關懷基金撥款賑災，尋日佢聯同基金負責人一齊將啲錢以寫有「一點關懷」嘅信封袋好，透過九龍城民政事務處轉交畀四十二名受影響居民。