政圈唔少人做咗祖父祖母輩，唔知係咪富貴黨前主席田北俊、前副主席周梁淑怡經常講湊孫經，搞到黨內出現恨抱孫潮。現任主席劉健儀（Miriam）更心思思，雖然佢嘅囝囝劉偉釗仲讀緊書，但Miriam已經好恨抱孫，前晚佢出席黨內新界東支部團年飯時，見到黨友個乖乖女，就即時嗌要抱抱，好似流晒口水咁。
Miriam話，已經好耐都冇抱過小朋友，問佢係咪好恨抱孫，Miriam就笑笑口咁話：「幾時得嚟吖，囝囝仲讀緊書，畢業至算啦！」
副主席「肥仔張」張宇人亦好恨抱孫，佢下個禮拜就會飛過去紐約探望四個月大嘅乖孫Evan。肥仔張話，Evan舊年十月出世時，原本有機會第一時間飛去探佢，但老婆大人話佢身形太大份，個女間屋住唔落喎，結果要等個女舊年聖誕帶埋囝囝返香港探佢先睇到個孫。