保育古舊建築已成為香港人好重視嘅議題，立法會建築、測量及都市規劃界代表劉秀成每年都會炮製心水特別月曆，今年就選擇咗以保育古建築為主題，仲親手勾劃出啲舊建築，收到佢呢款月曆嘅人都讚好有心思。
劉秀成每年都會親自設計月曆送畀新知舊雨，今年係佢親手畫嘅建築圖，包括重建前嘅香港會會所、舊滙豐銀行總行、皇仁書院前身嘅中央書院、舊郵政總局、前利舞台劇院、舊中環天星碼頭等十二棟已經被拆除嘅建築物，希望由此凸顯保育嘅重要。佢話，呢啲建築都係佢好鍾意嘅，可惜過去本港唔多重視保育，一啲好靚嘅建築有時好快就拆咗，諗起都有啲心噏。
據講，劉秀成有時都鍾意喺議會畫吓素描，不過，「拉布之王」社民連三子離開咗議會，開會速度快咗好多，睇怕佢第日喺議會畫畫嘅機會少好多囉。