林鄭一向有「好打得」之名，冇瞓一晚，尋日睇佢依然夠晒精神，照足原本行程連踩幾場，晨早先同立法會海濱規劃小組委員會成員去尖沙咀星光大道、馬灣公園同青衣城一段海濱長廊視察，行程完畢前仲同議員齊齊去荃灣圓玄學院食齋，下晝出席議員辦事處開幕禮。

呢個新辦事處位處嘅唐樓亦有五十三年樓齡，喺結構安全屬高危一族，問林鄭驚唔驚再塌樓？佢就微笑話唔驚，然後上車走人，再去隔籬街塌樓現場再次視察。其實到咗呢個地步，睇嚟林鄭驚都冇得驚，除咗加快驗樓外，就只有求神拜佛望唔好再有塌樓傷亡。