張學明嘅立法會選區喺新界東，但佢尋日跨區去到屯門開議員辦事處，主力梗係鄉村事務啦。發叔做主禮嘉賓，打鑼打鼓咁讚張學明，一時話佢有學識，一時又讚張學明有政治觸覺同遠大目光，更有愛國愛港嘅情懷，而且咁多年嚟為新界同香港作出咗好多重大嘅貢獻喎。

高帽一頂又一頂，搞到議員辦事處內一片稱讚之聲，全場人士莫不睇得出發叔嘅「愛明之心」。不過，開聲讚揚都唔及佢另一個動作咁有意義。係人都知，屯門係發叔嘅根據地，區內嘅鄉村事務當然由佢打理，但尋日張學明嘅議辦卻開入區內，某種程度嚟講，張學明已從實務上接咗發叔嘅波，呢一記長傳，都可以話係佢哋交棒嘅代表作。

不滿上水鄉委會阻拆霸王屋

發叔咁高度評價，張學明又點睇呢？佢嗌大家唔好諗咁多喎，仲好謙咁話自己完全冇諗過要接任做鄉議會主席，可以嘅話，佢希望發叔能夠繼續留任，帶領鄉議局。張學明咁識做，抵發叔咁睇重佢。

席間大家仲講到上水鄉事委員會前日安排班長者喺河上鄉堵塞通道，令地政總署人員唔能夠如期清拆「霸王屋」，發叔義正辭嚴，話對佢哋嘅做法感到遺憾同不滿，認為鄉事委員會應該以磋商嘅方法解決問題，咁先能夠真正為鄉事服務喎。