疑裝修工打斷主力柱

工程師學會副會長朱沛坤昨稱，出事樓宇建於五十年代，主要靠多條樑柱支撐，恰巧地舖進行裝修工程，可能因工人打斷部分主樑柱令樓宇倒塌，「裝修工人始終唔係專業工程師，可能唔識分邊度係主力牆，唔覺意打斷咗就冧樓！」他強調：「就算係舊樓，你唔郁佢，佢都唔會無啦啦自己冧。」

朱沛坤形容現時裝修工程可謂「無王管」，「香港啲樓面積咁細，個個都話要拆牆，又唔知係咪結構牆，好容易出事」，他特別指出，在中環蘇豪區、銅鑼灣時代廣場一帶的「活化」唐樓情況最嚴重，該些唐樓樓齡一般達數十年，但因位處旺區，不少業主翻新單位內部設計成商舖食肆，卻隱藏危機。

內櫳變晒損樓宇結構

他說：「啲單位內櫳變晒，今次拆呢度，下次拆嗰度，拆吓拆吓就面目全非」或會影響樓宇結構，故促政府盡快監管裝修工程，要求各工程若有結構性改動，需由工程師勘察，並提交資料。

測量師學會建築測量組副主席何鉅業亦稱，事件反映小型工程監管制度十分重要，過往公眾都不重視監管室內工程，但裝修時或損毀樓宇結構，學會將會教育公眾，工程承建商質素也要監管；他又稱，樓宇失修導致建築構件嚴重受損，並非突然之間出現，之前會有很多徵兆，可憑肉眼看得出來，有需要再作深入檢測。