申訴專員黎年都幾夠薑，新官上任冇耐就發炮，搞到政府冇晒面。嗱，今次呢炮更直轟大內。事關政府前年招聘一批副局長同政治助理，事後有市民向特首辦索取有關呢班新貴嘅薪酬資料，對方就以「政治委任官員嘅薪酬屬於個人資料」為由拒絕提供，真係九唔搭八。申訴專員就踢爆，公開資料守則列明，只要得到當事人同意，而且涉及公眾利益，就可以披露，但特首辦冇向市民解釋清楚。

講開又講啦，當日招聘呢班新貴，完全係黑箱作業，唔單止佢哋嘅薪酬唔畀人知，連國籍都話係私隱，卒之搞出個八國聯軍大醜聞。話時話，想撳住件事都搵個好啲嘅理由吖，一句「個人資料」就想過骨，當市民傻嘅咩。副局長同政治助理唔係私人公司僱員，佢哋係用公帑出糧嘅，每一毫子都係納稅人嘅錢，市民點解無權知道呀？

食環署仲離譜，前年有含三聚氰胺食品流入本港，食環署檢驗咗一啲食品樣本，不過冇將結果原原本本公布，淨係講有冇含三聚氰胺，問到含量有幾多，就打死都唔肯講。署方話喎，公布數據會影響同供應商嘅關係，仲會畀人哋告誹謗。申訴專員直斥食環署對守則一知半解。

叮佢個鎯鎯，呢單嘢唔係講笑o架，分分鐘會搞出人命，市民係咪有權知道全部檢驗結果先？食環署點可以講啲唔講啲，究竟供應商嘅利益重要定係市民嘅健康重要呀？

申訴專員直炳政府平時培訓不足，又欠缺監管，所以搞出咁多大頭佛，佢建議政制及內地事務局加強培訓人才。局長林瑞麟就打蛇隨棍上，話好重視申訴專員嘅報告，應承繼續提升培訓及推廣工作。

不過計太一叮話齋，要害唔係培訓不足，而係官僚作風作怪。其實申訴專員踢爆嘅只係冰山一角咋，公署到依家為止已收到超過一百單拒絕披露資料嘅投訴，其中有四成係近兩年接到嘅。好明顯，政府內部上上下下蝦碌多多，亂成一團，錯咗又唔肯認，推得就推，畀傳媒踢爆先至認吓錯，仲遮遮掩掩，鍾意就講啲，唔鍾意就唔講，已經搞到冇晒公信力。

所以話啫，家陣政府當務之急，唔係培訓接受索取資料嘅職員，而係從上到下咁整頓內部嘅官僚作風。唔係嘅話，又點可以改善施政，取信於民呀？叮！