小白觀點：公主病發作非同小可

警察當街畀個中女兜巴星，認真失威。唉，呢個警察又係嘅，港女一向都係唔好惹㗎啦，即使唔係華裔女人，喺香港住咗幾年都會受到感染，但凡患咗「公主病」，都可以歸入港女之列，輕則動不動發脾四，重則一唔高興就打橫車個手袋過嚟，好心有咁遠時走咁遠啦。

話時話，對於一個訓練有素嘅警員嚟講，今次嘅表現實在好難叫市民收貨喎，人哋布殊仔幾廿勾都避到隻飛鞋，睇佢後生細仔，一個巴掌都避唔到，有冇水皮啲呀？仲有呀，嗰巴打得咁鬼響，呢位人民警察隔咗兩秒至識畀反應，遲鈍都算嘞，只係略嫌做戲未做足全套，不如扮到中咗如來神掌咁，彈飛八呎撞牆再趴地吖笨！

網友觀點...X）...

[　神父　]

呢位警察哥哥做得好啱，畀女人打一巴冇還手，但稍欠完美嘅地方，就係冇好似耶穌咁畀佢打埋另一邊。

[　曹探長　]

鏹魔當佢哋冇到，依家連中女都唔放佢哋喺眼內！香港警察真係要立番啲威信先得喇！！

[　匿名　]

真係無法無天！！！拉佢去坐監啦！

[　森森　]

佢冇人同佢講Happy new year，咪試吓兜巴星囉。

網址：www.sunsiupak.blogspot.com

阿豪觀點：警員英語水平再出醜

有個講英文嘅阿嬋，交通意外後被警察截停，死唔肯吹波波不特止，仲嚟手摑咗個差大哥一巴，好在個差人叔叔都唔係流嘅，識得「累」低呻吟嗌痛，據講依家個女人已經被捕。

大家有睇新聞都知，呢位女士用字正腔圓嘅英文大吵大鬧，又I dont care又I want to leave咁，搞到在場嘅差人慌晒手腳，雖然即刻有警員改英文channel，但係大家都好似雞同鴨講咁。大家唔好唔記得，上次尼泊爾深山大野人嗰單嘢，外界都已經對前線警員英語水平有啲微言㗎啦……

仲有，呢個唔係普通港女，而係名人嘅親戚，當局之後會唔會秉公辦理呢？大家不妨放長雙眼睇睇。

網友觀點...X）...

[　四眼張　]

個女人一話自己有情緒病，咪又係罰款了事……

[　少林弟子　]

呢個女人唔知佢學邊派功夫，內功深厚到一巴可以摑低個差佬！真想領教一下。

[　karris-wong　]

個警察啲戲都好屎啦，打一巴就「累」低～～

[　zsues　]

睇新聞話個女人之前都試過襲警㗎喇，今次再打警察，實要坐監啦！

網址：www.lukchiho.blogspot.com