立法會議員劉慧卿尋日喺網上電視台訪問運輸及房屋局副局長邱誠武，錄影前好似教仔咁好細心同邱武交代晒點樣望鏡頭，又教佢點坐先型仔，跟住仲提醒佢唔好一輪嘴咁講嘢，否則會悶壞觀眾。由此可見，卿姐係教緊邱武乜嘢叫做面對群眾，但佢偏偏唔生性。
錄完一節節目後，卿姐發現邱武講嘢太陰聲細氣，觀眾可能聽唔到佢講乜，即刻要求佢講嘢大聲啲，點知邱武就寸番轉頭話佢講嘢冇卿姐咁高分貝，又話自己對住女性講嘢係會溫柔啲，堅持唔肯講大聲啲。睇到佢咁嘅態度，卿姐當堂有啲激心，仲叫邱武唔好當佢係女性，就當係外星人「阿凡達」就算喎！
卿姐跟住叫佢講番當局到底喺邊度就高鐵走線諮詢大角咀居民，又問佢內地起高鐵到底用咗幾錢？但佢唔識答之餘，仲耍官腔。其實卿姐已放晒水畀佢交代多啲詳情，睇吓可唔可以令民怨降溫，但佢偏偏牛皮燈籠點極都唔明，真係神仙難救。
節目後段提到港大民意調查計劃打算終止對副局長嘅民意調查，卿姐問邱武有冇唔開心同檢討過呀？點知邱武話如果同類調查喺外國做，訪問番市民對副大臣嘅認知率，個結果將會同香港嘅一樣。擺明喺度死撐啦！