話時話，政改諮詢仲有三個禮拜就完結，首席推銷員、政制及內地事務局局長「林公公」林瑞麟尋日同發展局局長林鄭月娥行孖必，去建造業界搞嘅閉門政改諮詢論壇，現場有近百名業界人士。
論壇一開始，主持人都講笑咁話知道業界一見到林鄭就會好多嘢講，叫大家盡量關注政改問題，點知林鄭乘機食住上，曲線幫政改講好話，指最近已經有千億工程上馬，加上建造業界嘅失業率已連續八個月下跌，相信工人應該冇乜怨言，所以每個人都有能力「同心協力、互惠互讓」咁一齊推動政制向前發展。
呢番言論驟耳聽落都幾合邏輯，但諗深一層林鄭似讚自己多啲喎，話喺佢做局長後建造業失業率有改善，但需知道依家建造業界嘅失業率係百分之七點四，仍然係咁多個行業中最嚴重，佢咁樣「提醒」班工友會唔會有反效果，仲激起班工友嘅怨氣㗎？
林公公尋日孖住林鄭推銷政改，但在座班建造業界似乎對林鄭有興趣多過政改喎！