互聯網嘅威力有幾大？好似facebook咁，可以號召網民上街集會，唔少人嘅個人相簿亦透過佢曝光，影響力無遠弗屆。行政會議成員阿Ron夏佳理亦感受到facebook嘅威力，佢湊孫嘅相就係喺嗰度流傳，朋友睇到向佢品評一番，佢至如夢初醒。
阿Ron話毫無戒心將啲相片放上facebook嘅，唔係佢「90後」嘅細仔，而係佢「60後」嘅大仔。事緣阿Ron有次同佢七歲嘅孫仔沿住告士打道唔同品牌車行陳列室睇車，孫仔愛車，一面睇一面影相，不知幾高興。點知後來有朋友同佢講：「你都好錫個孫喎！」搞到佢一頭霧水，原來朋友喺facebook睇到晒啲相。
早前立法會財務委員會討論高鐵撥款，財委會主席劉慧卿點名要求身兼西九諮詢委員會財務小組召集人嘅阿Ron出席，結果佢兩日坐咗十粒鐘，只係答咗五條問題。財委會討論高鐵嘅拉布戰，影響都係無遠弗屆！