《議事規則》規定呢個七人調查委員會要有五個委員出席先夠法定人數，即係如果有三個議員遲到超過十五分鐘，個會就要取消。調查委員會原本喺朝早八點半開波，但身兼河南省政協常委嘅林大輝請咗假返河南開會，身兼房委會商業小組委員嘅方剛都話撞正一年得兩次嘅小組會議嚟唔到，即係其他委員要到齊先夠數。

人算不如天算，陳健波尋日瞓醒覺得極唔舒服，手軟腳軟，佢心知不妙，第一時間就打畀委員會主席「蘇菲」梁劉柔芬（圖）求救，跟住就飛去睇醫生。蘇菲眼見流會在即，當機立斷將個會延遲一個鐘，又即刻喪call前黨友富貴黨嘅方剛返嚟開會，最後先可以避過流會呢一劫。

經過兩次會議，委員會其實就程序嘅問題都討論得七七八八，但係咪用立法會權力及特權條例傳召女事主嚟作供，委員意見就有啲分歧，到依家都仲未有決定。不過委員會希望下次開會可以解決埋呢類紛爭，喺下個月底正式展開聆訊。