經過反高鐵事件一役，「80後」青年嘅行徑備受關注，有褒亦有貶。培育過萬名「80後」大學生嘅理工大學校長唐偉章，尋日出席校長學生交流會時，學生提咗五、六條問題都係圍繞「80後」，有學生指反高鐵學生被視為暴民，學校點保護佢哋？又問若果陳巧文事件喺理大發生，理大會點做？
問題都好直接尖銳喎！但唐校長話大學政治立場中立，支持學生發表各種意見，但唔支持以暴力行為表達，仲話：「無論係年輕人定係工作嘅人，佢哋有意見發表係好事，但係發表後，人哋唔接受你意見，你哋都要接受番人哋唔接受囉，唔應該用過於激進的行動抵抗。」究竟班學生收唔收到校長嘅提點呢？咁又真係好難講，但唔緊要，佢話想搞個座談會，畀正反雙方人士喺校園辯論喎！
會後唐校長笑言自己掹車邊都算係「80後」，但唔係指「80後」出世，而係喺「80後」取得博士學位咁解啫！認真幽默。