車公籤文話「內有家鬼」，煲呔曾中到正，喺○八年十一月畀一名家務員率領一班「80後」玩轉禮賓府仍懵然不知，直到日前有人將有關照片放上網先揭發事件。雖然仲未知呢個家務員會唔會受到懲處，但就暴露咗禮賓府保安好有漏洞。唔知係咪因為咁觸動咗煲呔曾嘅神經，尋日有電台節目爆料話事件曝光後，特首辦落「柯打」叫咗警方到禮賓府進行地氈式搜索，檢查有冇畀人裝偷聽器。
主持人仲幽煲呔曾一默，話煲呔曾可能經常同啲心愛嘅錦鯉講心事，如果魚池畀人裝偷聽器就弊嘞，所以好應該搜索吓。特首辦發言人就回應話禮賓府一直由警員駐守，基於保安理由，有關保安工作同細節不便透露，但就冇否認有大隊警員操入禮賓府搜索；警方就話家務員涉嫌帶朋友入禮賓府事件，一直由特首辦跟進，警方不作評論，都係既唔否認又唔承認。
不過如果傳聞屬實，支下籤就更加靈驗嘞，事關「80後」玩完一輪，依家又輪到警員去翻轉多次，應晒「家宅不吉」囉！