老實講，當年一個步入中年，另一個芳華正茂，偏偏撻着譜出戀曲，仲開花結果，令大家都嘖嘖稱奇，喺外人眼中覺得佢哋擁有一個溫馨嘅家庭，誰不知原來佢哋心裏各有鬱結。

兩公婆舊年十一月喺受浸典禮做見證時盡爆心中情。阿松喺教會學校讀書，日日唱聖詩、唸主禱文，但對主都冇乜大感覺，仲話中學畢業後，學業同事業都較順利，所謂少年得志，佢心裏面冇空間去接納主。

後來講到○三年離開政府，雖然佢冇提及係乜嘢事，咪就係當時佢做財爺制訂預算案時，涉及偷步買車醜聞囉！雖然遇到挫折，亦都突然多咗好多時間出嚟，但因為佢對人生一切同命定唔理解，於是就冇再繼續尋主嘞！

跟「大佬」心情輕鬆咗

直至有官場朋友向佢提出命定嘅另一解釋，再跟埋佢返教會，喺○四年起向主禱告後，佢喺○七年決志信主。佢話以前過分自信，以為乜嘢都可以搞得掂，依家將所有事交畀主，就好似有個大佬跟咁，靠嘅係主嘅力量，所以輕鬆咗，但依家仍然要不斷學習，特別係學習謙卑。

咁小伏又點呢？原來佢喺○六年底至○七年初同娘家因事鬧意見，兩公婆都對娘家某啲做法唔理解，而佢作為女兒就特別鬱悶，心入面好難受。後來佢同囡囡一位同學嘅家長傾開，而嗰位家長係虔誠嘅基督徒，於是同佢一齊禱告，之後佢個心完全平和番，之前嘅鬱悶同對家人嘅不快感覺完全一掃而空。其後跟身邊嘅教友查經，令佢學會唔少做人道理，再加上當時阿松代佢禱告，希望佢能夠多學人生道理，於是乎佢亦都信咗主嘞！

雖然阿松同小伏信主都各有原因，但佢哋有一個共通點，就係同樣有信主可以得永生呢個信念，亦都改變咗佢哋對現世種種事情嘅睇法，唔會太執着。