近日facebook流傳一批年輕人遊玩禮賓府嘅相片，相入面班相信係八十後嘅後生仔女喺禮賓府玩到癲晒，騰出騰入周圍Hea，先嚟BBQ大會，燒羊架、煎蝦碌，跟住喺禮堂扮煲呔曾授勳、坐喺會客室扮同國家領導人會面、對住特區區旗扮「沙冧」，連廚房廁所都唔放過，更唔少得玩埋煲呔曾個御用錦鯉池，玩到興致勃勃，十足十禮賓府「新主人」咁款。

咦，杜鵑花有排都仲未開，唔通禮賓府「開放日」提早咗？錯！其實呢班人全部都同煲呔曾三唔識七。特首辦發言人尋日回應話，相入面有人係禮賓府一名家務員嘅朋友，話特首辦會跟進事件，仲強調煲呔曾事前並唔知情喎。

叮！禮賓府守衞森嚴，咪話入去，連喺門口遞封請願信都唔容易。依家成班人唔單止入咗去，仲開埋派對玩成日，狗大門高嘅禮賓府原來係冇掩雞籠，咁嘅保安兒唔兒戲啲呀？

發言人又話，禮賓府係莊嚴嘅地方，所有訪客必須尊重。又係廢噏，訪客梗係應該守規矩啦，至弊呢班全部都係不速之客，百無禁忌，話之你有乜規矩。

呢嗱，睇到啲紀念品隨手拎起嚟望下，見到回歸鼎手多多摸勻要影番張相，連紀念香港回歸嘅油畫《盛世明珠》都畀佢哋用手指篤幾下，幾乎變咗「亂世遺珠」。萬一整爛幾件珍貴嘅紀念品，試問煲呔曾點向市民交代？

除咗成班後生仔女直出直入之外，連寵物都可以分享埋一份。好彩相片所見係隻狗仔啫，如果抱隻貓入去，煲呔曾嗰池錦鯉有難咯，隨時會變成天價貓魚。

叮！呢單嘢搞到通晒天當局至發現，咁大保安漏洞居然冇人察覺。呢次就話因為有人唔識死，將相放上facebook曝光啫，但好可能以往亦發生過類似個案，不過冇被踢爆，當局有必要向市民交代清楚。

諗深一層，全屋周圍任人睇、任人影，萬一有不法之徒袋個計時炸彈入去搵地方收埋，或者入廚房落毒，咁咪大鑊？再搞嘢啲嘅，搵個人扮成「末代港督」肥彭對煲呔曾「面授機宜」，再影輯相放上網，咁煲呔曾咪跳落維港都洗唔清，甚至搞到要「腳痛」？

退一步嚟講，煲呔曾連自己住嘅禮賓府都管唔掂，點管香港吖！仲有，禮賓府唔止係公物，亦係法定古蹟，每年花唔少公帑維護、保養嘅，叮！