尋日喺沙田馬場撞到Bunny，佢講起將遊南美就好雀躍，話此行恨咗好耐，今年終於有十八日長假，於是一口氣暢遊智利、巴西同阿根廷三地。南美治安麻麻地噃！佢話早就收到風，已請專人計劃行程同安排專車接送，所到之處人流唔複雜，包括會去智利歎紅酒，再去阿根廷騎馬、鋸牛扒同睇探戈，壓軸好戲係二月十四號嘅巴西嘉年華會，當日啱啱係農曆大年初一，佢跳住森巴舞過年，節目不知幾豐富。

查實Bunny對南美並唔係完全陌生，皆因佢曾經三度造訪中美洲洽談投資計劃，點知參觀廠房時睇見門口保安荷槍實彈戒備，擔心治安唔好得去邊，最後寧願賺少啲，好過要食驚風散。