依家政改諮詢進行得如火如荼，首席推銷員之一嘅政制及內地事務局局長「林公公」林瑞麟不停出嚟解畫，但佢尋日就一反常態，出席完一個政改論壇後，冇答到記者有關補選撥款嘅問題，最後仲衝咗去後樓梯逃離現場。最令人唔明白嘅係，佢專長係無論記者問乜都只會講佢嘅標準答案，但今次竟然連人肉錄音機都唔做！
除咗忽然避記者，林公公仲忽然幽默添！佢出席論壇時，繼續大數增加立法會議席嘅好處，但就突然加咗個新論點，話將來嘅電台節目主持人搵嘉賓時可以多十個選擇，成個會場嘅市民隔咗兩秒先識得笑兩聲。
另外，有嘉賓講笑話如果二○一七年林公公做特首，可能可以快啲處理普選立法會嘅問題。大家都諗住聽完就算，點知林公公好認真咁回應，話做人要知進退，講做特首，由尖沙咀排隊到中環都未輪到佢喎！