今年佢扮聾耳陳，繼續花錢搞形象宣傳。尋日佢喺網誌度話新一輯宣傳片畀外界批評佢係扮攝青鬼同竊聽，佢話一啲都唔介意，自我感覺良好不在話下，仲自吹自擂話引起多啲人討論已達到佢目標嘅一半。

亂嘥公帑搞形象工程

究竟佢知唔知自己做緊乜？佢搞呢啲宣傳係想多啲市民就預算案畀意見佢，但啲市民只係留意到佢竊聽同係攝青鬼，根本係本末倒置。

最弊係佢對自以為創先河出嗰本漫畫推崇備至，話漫畫嘅主角「日仔」讀大學，而故事內容仲講到「日仔」穿梭時空返到去三國時代，好多人認為「日仔」已經大個仔，不妨安排感情線，所以佢歡迎市民提出有關「日仔」日後際遇安排嘅意見添！

睇到佢咁講，即係話若果佢出年仲做財爺嘅話，又會再出漫畫搞形象工程啦！佢仲話會聽取各方意見，但班議員鬧極佢都唔聽，仲好似自閉咁一意孤行亂嘥公帑噃！