Facebook近日流傳一批年輕人去禮賓府遊玩嘅相片，依相片所見，呢班不速之客拖女帶狗，似朋友聚會，而禮賓府一日遊嘅行程節目相當豐富，先嚟BBQ大會，玩到日落黃昏，就喺煲呔曾御用錦鯉池前放狗同影相，盡情體驗煲呔曾平日賞鯉嘅樂趣同閒情。

呢班「80後」玩得盡興，索性穿堂入室，直搗府邸心臟會客廳，試坐煲呔曾平日用嚟接待外國政要嘅梳化椅，模擬國家領導人會談，之後再闖入禮堂，企上頒禮台上扮授勳，而禮賓府嘅廚房同廁所都全部唔放過。

司局長開早禱會前會將手機放喺儲物櫃，地點夠晒機密，青年都一於影餐飽。	「嘻嘻，我扮煲呔曾，你鍾意扮邊個？」 設計對白	廚房都玩一餐，好彩佢哋冇喺煲呔曾嘅食物度落瀉藥。

佢哋仲手多多，摸勻回歸鼎同紀念香港回歸嘅油畫《盛世明珠》，又拉扯特區區旗佯裝敬禮，更加直入煲呔曾每日同官員開早禱會嘅會議室，參觀司局長開會前交放手提電話嘅儲物櫃。唔係呢班「80後」攻入禮賓府，仲好慷慨咁將相片放上Facebook同網民分享，外界都唔知禮賓府原來可以咁好玩！

應整味薑葱錦鯉款客

特首辦發言人回應事件，指相中人係禮賓府家務員嘅朋友，煲呔曾唔知情，會了解同跟進事件，目前嗰名家務員仍返緊工；又話禮賓府係莊嚴嘅地方，訪客應予尊重。

煲呔曾鍾意查就等佢查，但禮賓府唔係用嚟招呼賓客嘅咩？今次「以禮好客、以禮待賓」啱晒啦，佢信誓旦旦咁話想同班「80後」溝通，依家「80後」鍾意喺禮賓府BBQ，咪畀佢哋開爐燒雞翼囉，咁先叫與民同樂嘛，咪鬼一年開放兩次咁少啦。

煲呔曾成日落區做騷，都係想打造親民形象，倒不如全面開放禮賓府畀市民入去暢遊玩樂啦！其實煲呔曾抵得諗嘅話，就應該親手下廚，整番味薑葱錦鯉畀市民一飽口福，插水嘅民望隨時抽底回升呀！

禮賓府變咗遊樂場，以後班「80後」嚟玩都嚟唔切啦，仲有邊鬼個會衝擊禮賓府呀？