小白觀點：舊式象形評分最實際

教育局日前公布新香港中學文憑試評級，5級水平仲要再拆分5*同5**級，都唔知為乜。教育局副局長陳維安叫市民唔好太關心評級名稱喎，真係好笑嘞，家長學生唔關心，但請人嗰個關心吖嘛，嗱，有僱主代表講到明對呢個文憑試冇信心，咁就死啦！

記得小白老弟讀書嗰一代，邊度會有咁多無謂嘢㗎，評分好似象形文字咁，一睇就知龍與鳳，火箭係A，多幾支喺手自然可以一飛沖天啦；至於攞U囉喎，唔使講當然就係揸兜啦，亦即係話聽乞米都得嘞，評分明碼實價，僱主心中有數。話時話，有呢個新評級都唔係壞事，以後老闆請人，唔理好醜，見係「5**後」即刻免問唔使煩。

網友觀點...X）...

[　Poor Sir　]

政府搵嚟搞，愈整愈亂，叫人唔好關心，咁整嚟做乜呀？多餘！

[　搞笑局長　]

我只係負責教育，至於僱主唔知點請人，最好去煩勞工處處長啦。

[　傻仔明　]

教育局不嬲都鍾意搞新意思，最重要嘅學生質素卻搞嚟搞去都搞唔掂，僱主就最清楚o架啦。

[　Pete　]

咁搞法，學生、家長、僱主都癲啦，都唔知邊個冇嘢搞搵嘢搞，得閒做啲實際嘢好過啦！

網址：www.sunsiupak.blogspot.com

阿豪觀點：語文水平被僱主詬病

教育局公布新嘅香港中學文憑試評級，未講到詳情，淨係評級嘅叫法已經引起家長同商界質疑，尤其係將5級水平再拆分5*同5**級，以前ABCD咁就易分啫，家吓12345都已經唔係好慣，仲整多個5**，淨係個正確叫法都考起人啦！

老實講吖，大家最關心嘅唔係你點樣評級法，而係到底班口靚仔出到嚟究竟乜嘢水平。有僱主直指依家大學生啲語文水平好唔掂，佢哋請人前會自己再考核一次先。

所以話呢，與其花心思諗吓點改個評級名，倒不如實實際際提升學生嘅語文水平好過啦，再係咁落去，就算復古到用番「狀元」、「榜眼」、「探花」都係盞搞嘅啫。

網友觀點...X）...

[　李怒冒　]

教育局都係用心良苦，因為果啲A級（Cup）、D級同E級會令唔少男士心邪！

[　校工　]

既然大多數人對新評級唔滿意，點解唔作適度嘅修改？又係唔聽民意嘅例證！！

[　學生哥　]

好想啲搞事政客幫幫手，搞個起義，推翻考試制度，人人唔使考試就好嘞！

[　70後老野　]

好彩我一早畢咗業，否則對住呢啲評分制度真係嘔血！！

網址：www.lukchiho.blogspot.com