今時今日，港府十足楊朱嘅翻版，孤寒兼縮骨到冇朋友。明明對市民有利，對香港長遠發展有利嘅事，偏偏唔肯投入資源去做，乜都要市民自己搞掂。嗱嗱嗱，港府又靠嚇準備向市民開刀啦，呢次仲涉及市民日日使用嘅巴士服務添，認真唔講得笑。

立法會交通事務委員會同環境事務委員會尋日召開聯席會議，傾重組巴士路線，改善空氣質素。環境局副局長潘潔話，如果喺繁忙路段減少一成巴士班次，可以令可吸入懸浮粒子同氮氧化物分別減少百分之二同百分之四喎。

重組路線之後，路面巴士少啲，塞車少啲，空氣清新啲，人都醒神啲，市民梗係拍爛手掌啦。但咪住，港府搞環保下下講錢，唔通今次轉咗性？叮！邊有咁着數吖，運輸及房屋局副局長邱誠武聲稱，重組巴士路線可能會令車費「輕微增加」。

叮！港府搞環保從來都係口爽荷包立，呢次又係羊毛出在羊身上。不過，太一叮始終唔明，點解重組巴士路線一定要加車費呢？市民未見其利先見其弊，日後空氣質素會唔會改善仲係未知之數，但錢就肯定要先付出，擺到明又係搵笨嘅啫！

冇錯，環保係大家嘅事，市民唔介意付出適當嘅代價，不過咁，如果講到用者自付，政府更加係責無旁貸喇，點解咁多年來，當局除咗齋噏，卻從來唔識得付出呢？佢哋真真正正為環保做過乜呢？

呢嗱，排污費要市民用者自付，一收就停唔到手；減少使用膠袋要徵收膠袋稅，但收到嘅錢唔係用嚟搞環保，而係鎖入庫房，袋袋平安；舊年當局推出十九項改善空氣質素嘅建議，唔係涉及加電費就係加巴士票價，港府一個崩都唔使出；日前當局又推出新招，話要徵收「電器回收稅」，同樣係市民埋單。

最搞笑嘅係，煲呔曾喺施政報告推出所謂慳電膽券，呢頭未曾派券，嗰頭就話要加電費，你話港府係咪靠害吖？呢樣費，嗰樣稅，當局搞環保，淨係識得打市民荷包主意，問題係，如果乜都要市民自己搞掂，咁仲要呢個政府嚟做乜？

最弊嘅係，市民為環保付出昂貴代價，但環境未見改善不特止，空氣仲愈來愈污濁，藍天白雲愈叫愈走，你話係咪冤哉枉也？叮！