尋日咁啱喺中環撞到嫻姐同運輸及房屋局局長Eva鄭汝樺食飯，唔通嫻姐咁快就做定準備，以便將來重返議會為「80後」發聲？嫻姐話今次的確係搵Eva傾公事，講吓沙中線對市民嘅影響，但同時強調佢好享受冇做議員後嘅半退休生活，兩度斬釘截鐵咁話一定唔會參選。佢又自爆前後已有幾十人游說過佢參選，好多謝大家咁睇得起佢，但係佢真係真係唔想復出喇，大家可以慳番啲口水。

講完拜拜後，轉頭就收到嫻姐賣樓嘅消息。層樓位於灣仔永豐街永豪閣高層，由嫻姐同親人共同擁有，喺八八年以七十一萬三千元買入，依家以七百二十八萬元賣出，升值超過九倍，平均呎價高達一萬四千元，足以媲美唔少半山豪宅，估計係由發展商收購用作將來整棟樓重建。

嫻姐以前講過呢間係佢媽媽生前叮囑佢買落嘅「姑婆屋」，不論對方出價幾高都唔會賣。

唔知今次行動係代表嫻姐儲定彈藥退休，定係反映呢個世界冇嘢可以講得埋？真係未到最後一刻都唔知。