早前煲呔曾畀網友踢爆公鏡私用，使用政府新聞處一支長鏡頭去元朗南生圍觀雀，當時特首辦辯稱煲呔曾借鏡頭係為咗寫一篇候鳥網誌，宣揚生態保育訊息。事隔十多日，煲呔曾篇補鑊網誌尋日終於出爐，擺明係嘔番啲相出嚟補鑊啦！可惜網誌內容夾雜好多廢話，又話當日觀鳥遇到不少志同道合嘅朋友。係朋友就唔會踢爆佢公鏡私用啦！
煲呔曾只用兩三行文字簡單介紹三種雀鳥，其餘大部分都係講自己觀鳥經過同體會，最廢嗰段係話自己喺寒風颯颯、風吹雨打嘅野外環境觀鳥，而觀鳥講求嘅專注同耐性，令佢呢個「急性子」有所平衡，同熱烘烘嘅香港政壇一樣，令佢學識克制同忍耐云云。如果識得克制，就唔會成日玩爆肚，仲要爆親肚都講錯嘢添，難為佢仲敢堂而皇之講呢番話！
佢又話政府嘅保育政策致力維護本地生物嘅多樣性，令市民可共享呢啲寶貴嘅天然資源咁話。既然係咁，為何身兼觀鳥會成員嘅天文台前台長「黑英」林超英，日前高調質疑政府點解容許有人藉發展之名在塱原濕地建屋呢？如果係誤會，政府就真係要檢討吓喇！