23/01/2010

播放本新聞相關短片

政情:李寧教「80後」尊重別人

龍傳基金尋日舉辦傑出華人講座,邀請咗「體操王子」李寧同幾百名「80後」後生仔女分享人生經驗。

李寧話運動員嘅天賦無可替代,好似內地嘅「跳水公主」郭晶晶同「欄王」劉翔都係從小就要接受訓練,將潛能充分發揮,所以必需把握年輕嘅黃金時間去訓練。如果唔係,大個咗點樣訓練都好難做出好成績。佢又話如果要做到及早培訓,政府就要投放更多資源,成功培訓運動員,將來攞獎可為香港帶來榮耀,因為培訓嘅黃金時間一過,有錢都冇用。

儘管李寧喺體育生涯中經歷多番起跌,但佢仍樂觀積極去面對,領略到「承受失敗後,人生才會學得成熟」,所以有年輕人問佢人生中最大嘅遺憾時,佢笑住話:「我仲未死喎!」所以仲未有最大嘅遺憾,況且佢只係四十幾歲,仲有漫長嘅前路要行。對於點樣處理人際關係,佢話:「你尊重別人,人亦會尊重你,互相包容,就算棘手問題都可以解決。」