立法會財委會尋日審議北大嶼山醫院嘅撥款，由於政府考慮緊喺第二期工程時同私營醫療機構合作，「長毛」梁國雄就質問食物及衞生局副局長梁卓偉，到時中標嘅私營機構會唔會唔起醫院，而起水療院同護老院，一嘢玩起政府。點知梁卓偉先寸佢話：「其實諮詢文件好清楚寫明，中標嘅機構係一定要起醫院，梁議員，你有時間不如睇吓啲文件先再問啦。」
被殺個措手不及，長毛唔服輸咁又話沙田嘅「港安醫院」當年話會用兩公頃起醫院，點知最後起得一公頃都冇，質問梁卓偉公私營合作最後會唔會搞到有相似嘅情況再出現。梁卓偉再寸爆長毛，話沙田係冇「港安醫院」，但仁安醫院就有間。
早前港大民調公布班副局長嘅認知度仍然極低，就連民調研究總監鍾庭耀都話要即時中止有關調查，費事嘥錢。梁卓偉忽然神勇，係咪睇完呢個調查唔忿氣呢？