泛民尋日開「飯盒會」傾吓總辭之後嘅手尾，原來喺度分餅仔，但最後只係得出公文袋袋巾傑同社民連黃毓民辭職後，佢兩個喺立法會政府帳目委員會嘅空缺，暫訂由公文袋其他議員同職工盟嘅李卓人填補，其他嘅仲未度得掂。不過泛民自己都深知，呢個問題唔易解決，一來佢哋要搵到人接手，二來要同建制派方面協調吓。

建制派未必協調

有建制派議員一聽見協調就彈起，大鬧泛民鍾意協調時就協調，唔鍾意嗰時就拉倒。好似調查民主黨甘乃威嘅調查委員會，泛民一聲杯葛，即使建制預埋位畀泛民，佢哋仍然一個都唔入。不過，工聯會黃國健就有另一睇法，認為唔應該乘人之危，反正啲位本來就係泛民，咪畀番佢哋做囉。

就以前年選中大校董個位為例。當時泛民中，公文袋嘅余若薇同黃毓民都有意做，但最後余若薇抽籤輸咗，到正式投票時又殺出醫學界「怪醫」梁家騮。今次余若薇係咪唔爭呢？佢話要先睇吓其他泛民有冇人想做先，咁即係又係想畀番自己友啦！佢仲話同時睇埋建制方面點先，至於梁家騮就話冇諗過。

其實呢啲位之所以要協調，無非係反映立法會中建制同泛民嘅比例。不過總辭之後，泛民議員人數少五個，比例上由近四成跌到三成，照計真係唔一定畀番泛民做，所以當中有唔少暗湧㗎！

再講，依家時間尚早，政治圈波譎雲詭，變數好大，到時泛民包括余若薇在內話要做番呢個位，都可能殺出好幾個程咬金，最後鹿死誰手仍然係未知之數，所以泛民同余若薇分到餅仔，都未必啃得落。