係人都知，車飛得愈快，出意外機會愈大。申訴專員黎年話，多年來，公共小巴交通意外率偏高。淨係二○○八年，涉及意外嘅小巴就有差唔多一千一百架，涉及嘅傷亡人數更接近一千七百人。意外多到咁離譜，睇怕「亡命小巴」要升呢做隨時攞人命嘅「馬路無定向飛彈」貼切啲。

申訴專員仲大翻舊帳，話運輸署早喺十年前就承諾過，會研究同制訂改善公共小巴營運安全嘅措施，但事實上得個噏字，乜都冇做到。嗱，好似喺車上安裝限速器同俗稱黑盒嘅行車記錄儀，以及為小巴司機提供培訓咁，佢哋根本就唔嗲唔吊，直到舊年年中連續發生兩單奪命車禍至知驚，規定小巴安裝限速器同黑盒。黎年似乎愈睇愈扯火，橫掂勸極都冇人理，索性自己主動調查點解運輸署延誤咗咁耐。

心水清嘅讀者都記得，本報一早已經點醒過班冇腦嘅官員，建議強制小巴裝限速器，認為咁做比較有效同實際。除此之外，本報記者亦多次親自坐小巴了解，並且對「亡命小巴」飛車情況深入報道，發現車速顯示器純屬擺設，話之部機點「嘟」，司機根本照飛可也。但運輸署一於少理，懶官我自為之。

叮！官員繼續懶懶閒，乘客繼續心慌慌，卒之搞到小巴意外愈整愈大劑。舊年旺角鬧市同元朗公路先後發生小巴剷上行人路，以及小巴同貨櫃車相撞意外，造成多名市民死亡。一向對小巴安全監管失職嘅運輸署成為眾矢之的，最終至規定公共小巴必須安裝限速器同黑盒。

試問運輸署署長黎以德，安裝限速器拖足十年，小巴黑盒嘅研究亦搞咗好幾年，呢段時間有幾多人因為你哋唱慢板而死得不明不白，做咗輪下冤魂？幾多家庭失去經濟支柱，家破人亡？你哋有邊次唔係出事後做一輪騷，過後冇人理o架？又試問申訴專員，依家至嚟查運輸署點解延誤落實措施，遲唔遲啲呀？

嗱，交諮會舊年第三季共接獲四千七百幾宗投訴及建議，涉及公共小巴嘅投訴有近千宗，較對上一季急升超過四成。公共小巴服務質素下降，歸根究柢係當局對業界監管完全唔到位。

咪話太一叮唔提醒你班高官，千祈咪以為裝咗個限速器同黑盒就可以高枕無憂。正所謂，道高一尺，魔高一丈，儀器係死嘅，人係活嘅，無論儀器幾先進，無良業者一樣會諗花臣嚟逃避監管，如果當局唔加強執法，繼續懶得就懶，蛇得就蛇，到頭來只會有更多慘劇發生。叮！