之前篤爆咗平等機會委員會擺「空城計」，政府急急補鑊出公告委任民政事務局前局長林煥光做新主席。二月先正式上任嘅佢尋日專登同平機會委員茶敍，交代佢嘅管治理念，希望可以盡早修補番同其他委員嘅關係。
身兼立法會議員嘅阿Paul謝偉俊同KK馮檢基等之前已對林煥光嘅委任唔多滿意，點知茶敍後，阿Paul就更加激心。阿Paul話一粒鐘嘅茶敍多數時間都係得林煥光一個人講嘢，認為佢應該聽多啲其他人嘅意見。佢又話感覺到唔少委員都對林煥光有啲抗拒。KK就覺得林煥光提出嘅管治理念同佢幾一致，但口講無憑，做落先真，睇嚟林煥光要各個委員都信任佢，仲要下一番苦功嘞！