舊年年底哥本哈根氣候變化會議，內地率先承諾於二○二○年將碳強度依○五年水平降低百分之四十五，相反本港繼續用能源強度做減碳指標，被批落後。邱騰華尋日出席立法會一個委員會會議時，再被追問相關議題時，佢膽粗粗推莊畀中央，直指連中央都覺個新指標「艱苦卓絕」，所以香港要再審視下情況，睇吓點盡量配合，拒訂時間表。

佢講佢嘅難處，話以兩電現時嘅發電組合，好難達到中央嘅減排目標，言下之意係要郁兩電，又談何容易？跟住又話會喺運輸方面做多啲，又係運輸，於是航運交通界嘅議員劉健儀睇唔過眼，就出聲鬧：「話做咗咁多嘢，有效定冇效？幾時先做到啲有效嘅嘢？」除咗一語中的外，仲係叫邱騰華咪匿喺車底，避唔到幾耐呀！