煲呔曾上場後施政頻頻出錯，令到一眾退休高官都睇唔過眼，齊齊炮轟施政不足之處。好似退休僅半年嘅天文台前台長「黑英」林超英日前就喺網誌質疑，「有勢力人士」逼政府同意以綜合發展為名於極有保育價值嘅塱原濕地建屋，仲狠批以前起落馬洲支線時，政府已經裁定塱原有極高生態價值，依家如果允許建屋，做法「荒謬」。
外界形容為「好打得」嘅發展局局長林鄭月娥尋日出席記者會講強制檢樓，畀記者問到點睇黑英嘅批評時，新聞官原本以「只講強制檢樓」為由幫林鄭擋咗條問題，點知佢竟然搶白話：「呢條我可以答」，之後以強硬態度直斥黑英嘅質疑係「荒謬」，又話：「話規劃署受有力人士影響對我哋嘅同事唔尊重……今日嘅政治環境同社會，唔應該隨便提出啲冇理據嘅說話！」
雖然林鄭好勇猛咁為政府護航，但睇番佢喺舊年年尾三度喺公開場合拒絕交代政府對問題骨灰龕嘅執法詳情，再對照番佢尋日嘅表現，點解有咁大差距？