政府畀外界狂轟諮詢不足同方法落後，又冇同啲後生仔女溝通，所以落得咁嘅下場，跟住Eva仲扮晒吸取教訓，話會用外界建議嘅方法多啲同唔同嘅人溝通，但仲死撐傳統諮詢方法有效。

仲係嗰副死性，當然又畀人鬧得更勁啦！可能因為咁，Eva一見到「80後」就特別敏感，唔理咁多就一頭樁咗埋去，就好似工程界社促會聽日搞嘅論壇咁。

扮有溝通零風險

老實講，運輸發展項目當然同工程界好有關係啦，但工程界社促會搞嘅論壇唔係講工程，係工程界「80後」論政制發展喎！本來做政改首席推銷員嘅政制及內地事務局局長「林公公」林瑞麟梗係要到啦，奇就奇在Eva竟然都係講者之一。

早前一段時間話其他局長都要幫手推銷政改，所以連勞工及福利局局長張建宗都忽然上身做咗推銷員，但呢種忽然上身嘅推銷手法已消失咗一段時間，今次突然到Eva上身，似乎有啲蹊蹺喎？

外界鬧Eva冇同「80後」青年溝通嘛，咁呢次咪乘機證明佢係會做嘢嘅。當日佢喺立法會畀班反高鐵「80後」咬咗一啖，仲話以大眾人身安全為由唔出去同佢哋對話，而工程界不嬲都係撐高鐵撥款，佢去到見到嗰班「80後」，肯定就係零風險啦。若果咁都算數嘅話就有啲縮骨嘞！其實，佢縮骨都有前科，好似之前落區見菜園村村民，但就唔見反遷拆嘅村民，呢次都係選擇性見「80後」囉！