話口未完，本港有懷疑打豬流感針之後死亡個案嘞。一名上月底接種豬流感疫苗嘅三十七歲懷孕女子，一月十九日去母嬰健康院接受檢查時報稱胎兒活動減少，轉介醫院後證實胎兒宮內死亡。

本港首名打豬流感針後出現吉巴氏綜合症嘅病人啱啱出院，依家突然又爆出懷疑引致胎兒死亡個案，你話唔驚就假。

至弊你有你驚，當局有當局齋噏。食物及衞生局局長周一嶽尋日仲死撐，話暫時毋須改變目前嘅接種模式，當局訂購嘅三百萬劑疫苗，足可以應付本港今年夏季同冬季嘅流感高峰期，但完全冇回應市民對疫苗可能產生嚴重副作用嘅關注。

衞生防護中心回應胎兒死亡個案話，目前冇醫學證據顯示個案同豬流感疫苗注射有關。叮！咁即係點先？市民最關心嘅，係啲疫苗打咗會唔會有事，冇證據顯示有事，換個講法，即係冇證據顯示冇事啦！

近排本港接連爆出懷疑注射豬流感疫苗之後出事個案，當局到依家仲未能夠解開謎團，又憑乜嘢咁肯定打咗唔會有事？講來講去都係嗰套，要市民點相信自己唔會畀當局搵笨做白老鼠？

嗱，其實市民已經用行動表咗態喇。依家接種疫苗嘅人數屢創新低，由啱啱開始時嘅每日過萬人，到前日得嗰兩千人多啲，用吓個腦就知發生緊乜事啦。「東方報業民意調查」發現，四成一受訪市民因為擔心副作用而未接種疫苗；三成一人覺得疫情唔嚴重而冇注射；更有一成三人直頭因為疫苗訊息混亂唔敢打針。你話港府係咪攞嚟搞吖？

防疫有備無患，訂購疫苗冇人反對。弊就弊在港府將對抗豬流感當咗政治騷，唔係用實事求是嘅態度嚟打呢場防疫戰，買咗疫苗返嚟就大安旨意，低估市民對注射風險嘅憂慮程度，相關資訊披露更加係嚴重不足，市民根本無所適從，咪惟有縮沙自保囉。

至離譜就係，疫苗注射計劃冇人吼，大批疫苗積壓，第二批共二百五十萬劑疫苗就快抵港。當局慌不擇路，話正考慮將免費注射對象擴展到五十四至六十歲人士喎，咁同攞更多市民生命安全嚟較飛有乜分別？

叮佢個鎯鎯！周一鑊仲話，訂購豬流感疫苗係因為當局希望有足夠保障，同買保險一樣。唔好再扮嘢啦，如果當初唔係你班高官怕孭鑊，未搞清楚疫苗嘅副作用就搏命入貨，用公帑為自己「買保險」，使乜搞出個大頭佛呀？