連月嚟亞視股權鬥爭鬧出唔少是非，亞視控股股東查懋聲尋日高調開記者會盡訴心中情。期間有記者問佢有冇後悔入股亞視，佢話當年患上末期胰腺癌，醫生同佢講只有三個月命，當時佢真係好後悔食嘢唔好、瞓得唔夠同冇好好照顧自己，但最後佢發覺後悔係冇用嘅。佢話搞亞視其實都係一樣，做好亞視就係推動力，唔想嘥精神去後悔。
查懋聲承認亞視積弱多年唔夠無綫撼，於是對亞視特別照顧周到，喺記者會講明畀亞視記者問先，仲可以問兩條問題，但到無綫記者提問時，佢就劈頭話無綫對亞視唔公道，亞視請親啲藝員個個都唔敢嚟，所以佢唔想答無綫記者個問題，搞到個記者好尷尬。不過佢最後都有答到，但總算為亞視出番啖氣。