立法會尋日開大會，民協議員KK馮檢基拎住疊紙周圍騰，原來係幫世界自然基金會拎份《為弱勢魚群發聲》嘅聲明搵同僚簽名。聲明大概係話希望簽聲明嘅人承諾以後唔再食藍鰭吞拿魚，亦希望香港食肆唔好再鼓吹市民食，幫呢種弱勢魚類留番條活路。

點知KK牙痛咁聲話搵咗成日都唔係好多人肯簽名，計埋得二十四個議員簽咗。即係逾半議員同藍鰭吞拿魚過唔去啦！

KK已經每個黨搵個代表幫手捉人嚟簽聲明，當中搵咗建仔嘅環境事務發言人陳克勤幫手，克勤仔拍心口話佢一個簽，黨員個個都會簽，但後來佢黨友李慧琼同陳鑑林都話冇聽過呢回事，李慧琼仲話因為囡囡實在太鍾意食日本菜，所以驚簽咗囡囡會詐型，睇個勢唔簽嘅機率都好高咁話。