曾對卿姐表現唔多滿意嘅工聯會議員KK黃國健尋日話，工聯會從來都冇話過要對卿姐提不信任動議，仲話卿姐其實表現都唔錯，冇乜道理同動機要不信任佢喎！

唔派人爭財會主席

唔止對卿姐表現嘅評價轉晒口風，KK就連對修改《議事規則》嘅態度都有唔同。高鐵撥款未通過前，包括佢在內嘅好多建制派議員都話應該認真考慮吓係咪要修改《議事規則》，但KK尋日話同其他建制派議員傾過，大家都覺得現行《議事規則》其實有授權主席停止拉布，只係唔同人有唔同做法，如果修改咗令到主席執行職權嘅時候冇咗彈性，又好似唔係咁好喎！

就連有份聯署要卿姐嚴格執行主席職權嘅富貴黨主席Miriam劉健儀尋日都話，認為卿姐有努力去令會議暢順進行，所以富貴黨係唔會提不信任動議。而修改《議事規則》屬議員議案，需要分組點票，到時泛民九成九唔會支持，所以提出嚟都冇用；如果其他建制派都認為有需要，可以喺「適當時候」提出，佢個人同黨都認為冇所謂，但何謂「適當」佢就冇解釋嘞。

咁會唔會搵人競選下屆財委會主席單挑卿姐先？兩黨就縮得仲快。KK話工聯會幾個人都唔係太適合，Miriam就話富貴黨個個都冇時間。照呢個情況，即係話建制派當初都係得把口嗌到鬼咁大聲，依家就全部縮沙褪軚、吹集結號退兵走人，都幾肉酸吓喎！