小白觀點：80後力保不失抵讚

近年好多風化案都同教師呀、校長呀扯上關係，之前有個鍾意影人裙底，日前新鮮滾熱辣有單法庭Case，「70後」教師竟然以影o靚模相作招徠，引咗一大班「90後」女童影裸照，真係世風日下，人心不古！題外話，呢劑「80後」冇參與其事，都可以講得上係吐氣揚眉咯。

依家嘅社會風氣真係亂晒大龍，以前呢啲淫獸一般叫做「金魚佬」，仲話有個猥瑣樣睇吓吖，點不知依家連道貌岸然嘅教師，都爭相進化成為「相機佬」，投身孌童大業，細路女真係防不勝防！哎呀，慘喇，家陣係人都拎住部數碼相機周街行，容乜易畀人誤會係淫賤不能移嘅「相機佬」o架！

網友觀點...X）...

[　校　　工　]

教師校長變咗色狼，係咪佢哋得閒得滯？定係工作壓力大以至失常呢？教育局局長應該好好研究一下。

[　徐副校長　]

大部分教師都係良師唔係淫師，嗰幾個只係個別事件啫！

[　劉　　太　]

幾恐怖，依家畀啲仔女返學都驚，教師原來都心術不正，教壞晒！

[　神　　父　]

係社會嘅錯，就係因為呢陣o靚模風氣，吸引啲o靚妹發夢，跟住就孳生咗啲淫蟲出嚟囉。

網址：www.sunsiupak.blogspot.com

阿豪觀點：現代金魚佬唔用糖

啱啱有個孌童癖教師網上布「o靚模陷阱」，被法庭判入獄四十九個月。呢啲人固然要重判啦，但法官都講咗句發人深省嘅話，佢話受害女童都係「90後」，只得十幾歲，質疑新生代係唔係有唔同嘅價值觀。

諗落真係好得人驚！以前啲金魚佬用糖果呃小朋友，被誘騙嘅都唔知會墮入陷阱，但係依家啲「90後」一話有o靚模做，就仆到去應徵，係「應約拍攝裸體照」o架喎。

記得以前有套戲叫《假如我是真的》，主角扮高幹子弟招搖撞騙，結果好多其他官阿諛奉承，主角最尾被告上法庭，一句「假如我是真的」問到法官都口啞啞，好在孌童癖淫師冇學嘢喺庭上大嗌啫……

網友觀點...X）...

[　傻仔明　]

o靚模影相，暴露差唔多係指定動作，想做o靚模就預咗有所犧牲o架啦！只係受害人遇到淫師而唔係伯樂啫。

[　吸毒o靚模　]

「做o靚模就預咗有所犧牲㗎啦」？嘩，點可以咁講，你唔可以排除有啲人真係想做「正當模特兒」o架喎！

[　九死一生　]

為人師表咁變態，好搞唔搞搞o靚妹，有需要去嫖咪算囉！

[　大　　蚊　]

依家連小學生都話要做o靚模，香港變咗咩世界呀？

網址：www.lukchiho.blogspot.com