撥款通過之後，示威人士更加慶合合，包圍立法會大樓，將班官員同議員困喺裏面，想走都走唔到。話時話，件事搞到咁大鑊，曾蔭權都應該出面講吓嘢啦，點知佢成個縮頭烏龜咁，聲都唔聲，正如有被困嘅議員話齋，「連電話都冇一個」。

好嘞，示威曲終人散，曾蔭權尋日終於現身，高調批評示威者衝擊立法會係違背香港核心價值。佢仲話，以基建帶動經濟社會發展係佢嘅施政理念，喺討論成熟嘅時候，就需要作出決定，唔應該議而不決。

煲呔曾做嘢不嬲拖泥帶水，依家忽然咁決斷，唔通真係轉咗性？其實佢喺度補鑊咋，事關佢上月底上京述職，被北大人訓示一番，要佢謀劃長遠、施政緊守底線等等。睇嚟中央對港府做事欠缺長遠規劃已好唔妥，特別擔心高鐵最終觸礁，會動搖港府嘅管治威信。

北大人嘅訓話令煲呔曾腳都軟晒，再咁落去，容乜易變咗第二個老懵董呀。所以佢一方面狂批示威者，另一方面大講施政理念。呢啲都係做畀北大人睇嘅，嗱，我做嘢唔係心血來潮o架，仲好有理念添。

叮！唔知底細嘅真係畀佢嚇死，知道嘅就畀佢笑死。其他唔講，淨係高鐵呢家嘢，就係議而不決嘅樣辦喇。呢條鐵路已經足足講咗十年，人哋廣東路段話做就做，○五年十二月中央拍板，第二年初就動工，今年就通車。

睇番香港路段，亦係同時拍板，可惜跟住就冇咗下文。班官閉門造車，研究嚟研究去，遲遲冇定論，直到依家先至通過撥款，話二○一五年可以通車喎，即管聽住先啦。

更弊嘅係，工程愈拖得耐，造價就愈貴，開頭話百幾億就搞掂，前年升到近四百億，依家就要近七百億，市民冇法子唔牙痛咁聲。講真啦，嗰啲反高鐵人士，多數都唔係反對喺香港起高鐵，佢哋只係反對用七百億嚟起二十六公里嘅鐵路啫。

唔單止廣深港高鐵係咁，其他大型基建項目有邊個唔係拖拖拉拉呀？煲呔曾三年前就提出十大基建救經濟大計，仲吹水唔抹嘴，話可以創造幾十萬個職位喎。依家除咗港珠澳大橋同郵輪碼頭叫做動咗工之外，其他通通坐言不行。

叮佢個鎯鎯！咁搞法，北大人又點會唔心急至得o架，煲呔曾如果再係咁唔嗲唔吊，睇嚟都好有機會好似老董咁扮腳痛喇。