尋晚嘅「飯盒會」有二十二名建制派議員出席，人數係五次中最少，但係就多咗兩個稀客，就係政制及內地事務局局長林瑞麟同副局長黃靜文嘞。早前有消息話建制派可能喺尋晚會為五區補選擺卒，傾吓邊啲人選可以搶到議席，但多咗呢兩個稀客，當然欲言又止啦！

聽聞大家酒過三巡，風花雪月一輪之後，無可避免會觸及建制派應唔應該陪泛民一齊玩五區總辭補選呢個話題，對補選席位雄心勃勃嘅建仔同富貴黨打開心窗說亮話，表態贊同參選，但亦有人覺得唔應該幫泛民造勢，但始終佔少數。

林公公曲線鼓吹參選

各自表述立場後，林公公竟然做起球證上嚟，話既然港澳辦同中聯辦都指五區總辭唔係「公投」，如果政黨有實力，大可參選無妨，即係曲線鼓吹建制派參選搶位。林公公有咁嘅舉動絕對唔奇，如果建制派幫手搶到泛民一、兩個議席，政府要通過政改方案機會又多幾分，林公公梗係要把握機會向建制派落嘴頭啦。