上禮拜六反高鐵人士衝擊立法會，爆發警民衝突事件，搞到咁混亂，政府高層點都要回應幾句，於是乎出現咗局長「爭場」嘅場面。
話說環境局局長邱騰華原本定喺尋日上晝十一點四十五分，喺政府總部講廢置電器同電子產品嘅回收徵費計劃，但運輸及房屋局局長Eva鄭汝樺同保安局局長李少光喺朝早政府早禱會後，決定對衝擊立法會事件發言，呢件事點都緊要過回收徵費計劃啦，所以邱騰華惟有「讓路」，等Eva同李少光講先，佢就延遲到喺下晝先講。
外界狂轟政府同市民嘅溝通差，啲官員梗係爭相出嚟透過傳媒向市民交代啦，呢種場面真係絕無僅有，就連煲呔曾尋日黃昏都要喺政府總部講一輪講咗等如冇講嘅嘢。