五區總辭如箭在弦，建制派表面上就話未決定會唔會出嚟參選，查實就已密鑼緊鼓，各自開始做嘢。有傳將會空降新界西嘅富貴黨常委田北辰仲已率先出動，印咗十萬份精美宣傳單張，寄畀新界西區同佢舊環頭美孚嘅中產家庭，為補選造勢。
單張嘅封面除有田二少嘅大頭相外，仲大大隻字印住「中產我撐你，無人理你有我」嘅字句，擺明係想以佢富貴出身做賣點去吸納班中產選民。單張入面嘅「疑似政綱」亦以中產角度出發，例如佢打算爭取政府減稅，希望得到嗰班冇得申請社會資助、仲要交重稅嘅中產支持。
最值得留意嘅係田二少今次嘅單張同一般議員嗰種「頭大、黨徽更大」嘅傳統競選單張唔同，搵勻晒成份單張都見唔到富貴黨嘅黨徽，只係喺單張入面嘅相見到啲豆豉咁細粒嘅黨徽出現喺背面。唔知佢係咪覺得近年各政黨都是非纏身，企圖淡化政黨畀市民嘅負面形象，望以「冷靜理性」嘅姿態，喺新西搶盡中產嘅票源，打低形象麻麻嘅社民連「大舊」陳偉業呢？
今次田二少仲以郵政通函嘅方式將單張寄入屋，話佢冇心去選都冇人信啦！