新卡片冠夫姓

麥嘉軒以香港會計師公會稅務委員會主席身份，出席該會就新一年度財政預算案發表建議書嘅記者會，見佢容光煥發，大晒左手隻巨型鑽石婚戒。搬咗入中大愛巢未呀？佢笑而不答，但就笑騎騎咁話新婚生活好愉快，多謝大家關心喎。

何解仲未度蜜月？原來佢工作至上，蜜月地點交由老公話晒事，仲叫大家去問吓膠樽義喎！麥嘉軒樂做小女人，連卡片都改為「劉麥嘉軒」，但當傳媒開口埋口叫佢做「劉太」時，佢對呢個新朵顯得有啲不知所措，仲直認聽唔慣，反應都慢過人喎！